SHBA ka vendosur sanksione ndaj një numri individësh rusë të lidhur me ndalimin arbitrar të kritikut të shquar të Kremlinit, Vladimir Kara-Murza, i cili është burgosur në Moskë për gati një vit pasi foli kundër luftës në Ukrainë.
Kara-Murza u arrestua në prill dhe u shpall “agjent i huaj”, dhe aktualisht po mbahet nën dyshimin për përhapjen e informacionit të rremë për forcat e armatosura. Ai përballet me më shumë se 30 vjet burg.
Sanksionet synojnë Elena Lenskaya, një gjyqtare nga Moska; Andrei Zadachin, një hetues special; Danila Mikheev, eksperte e qeverisë ruse në rastin kundër Kara-Murza; Zëvendësministri rus i drejtësisë Oleg Sviridenko dhe dy gjyqtarët, Diana Mishchenko dhe Ilya Kozlov.
Në një deklaratë, sekretari amerikan i shtetit Antony Blinken tha:
Shtetet e Bashkuara përsërisin thirrjen e tyre për lirimin e menjëhershëm dhe të pakushtëzuar të Kara-Murza-s dhe janë të përkushtuara për të siguruar që përpjekjet e Vladimir Putin për të heshtur kritikët nuk do të kenë sukses.
Kara-Murza, i cili ka nënshtetësi britanike dhe ruse, ishte një ndihmës i ngushtë i liderit të opozitës ruse Boris Nemtsov, i cili u qëllua për vdekje në qendër të Moskës në vitin 2015.
Ai u sëmur dy herë papritmas, në vitin 2015 dhe 2017, në atë që ai tha se ishin helmime nga shërbimet ruse të sigurisë, në të dyja rastet duke rënë në koma përpara se të shërohej përfundimisht.
