Shtetet e Bashkuara kanë tërhequr pjesën më të madhe të trupave që i kishin dislokuar në Nigeri më herët këtë vit, në kuadër të një operacioni për ndihmë në luftën kundër grupeve militante islamiste.
Në dhjetor, forcat amerikane dhe ato nigeriane kishin nisur një operacion të përbashkët në rajonin e Liqenit Çad, i cili përfshinte sulme ndaj militantëve në ditën e Krishtlindjeve, e më pas dislokimin e rreth 200 ushtarëve dy muaj më vonë.
Udhëheqësi i lartë i Shtetit Islamik (IS), Abu-Bilal al-Minuki, u vra gjatë këtij misioni disa mujor.
Të enjten, SHBA deklaroi se operacioni kishte qenë i suksesshëm, ndërsa zëdhënësi i ushtrisë nigeriane i tha BBC-së se tërheqja e trupave amerikane “nuk do të ndikojë në asnjë mënyrë në ritmin tonë”.
Pavarësisht operacioneve, grupet xhihadiste vazhdojnë të kryejnë sulme, veçanërisht në verilindje të Nigerisë.
Gjeneral-major Michael Onoja tha se shkëmbimi i inteligjencës mes dy vendeve do të vazhdojë, njësoj siç është konfirmuar edhe nga ushtria amerikane.
Bashkëpunimi ushtarak mes Nigerisë dhe SHBA-së është rritur pasi Uashingtoni akuzoi autoritetet nigeriane se nuk po bëjnë mjaftueshëm për të mbrojtur grupet e cenueshme nga militantët islamistë dhe pretendoi se në vend po ndodh “gjenocid ndaj të krishterëve”.
Nigeria i ka mohuar fuqishëm këto pretendime, duke thënë se dhuna është komplekse dhe prek të gjitha komunitetet.
Organizata që monitorojnë dhunën politike në Nigeri thonë se shumica e viktimave të sulmeve xhihadiste janë myslimanë, pasi grupet militante veprojnë kryesisht në veri të vendit, ku popullsia është kryesisht myslimane.
Sinjali – aty ku e vërteta flet para lajmit!
