Një roje që ruante arkivolin e Sandra Day O’Connor në Gjykatën e Lartë të SHBA-së humbi ndjenjat, teksa rrëzimi i saj u transmetua drejtpërdrejt në televizionin amerikan.
O’Connor, e cila ishte anëtarja e parë femër e Gjykatës së Lartë të SHBA, vdiq më 1 dhjetor në Phoenix, Arizona në moshën 93 vjeçare nga komplikimet me demencën dhe sëmundjet e frymëmarrjes.
Funerali i saj, u zhvillua dje, në sallën kryesore të Gjykatës së Lartë, ku shumë personalitete – përfshirë Kamala Harris – bënë nderimet e tyre dhe i dhanë lamtumirën gruas së rëndësishme.
Në pamjet e transmetuara drejtpërdrejt nga Gjykata e Lartë, një roje femër që qëndron pranë arkivolit shihet duke u rrëzuar, ndërsa ende nuk dihen arsyet pse humbi ndjenjat.
WATCH: Honor guard collapses while Sandra Day O’Connor lies in repose at the U.S. Supreme Court pic.twitter.com/6IMFgjEsei
— BNO News (@BNONews) December 18, 2023
Klipi në fjalë tregon një koleg roje që përpiqet ta mbajë, ndërsa gruaja merr ndihmë nga kalimtarë të tjerë.
Kush ishte Sandra Day O’Connor?
Konservatore, por politikisht e moderuar, Sandra Day O’Connor u emërua nga ish-presidenti Ronald Reagan në 1981 dhe shërbeu për më shumë se 24 vjet deri në pensionimin e saj në 2006.
Ajo u largua për t’u kujdesur për bashkëshortin e saj, John Jay O’Connor, i cili po luftonte me sëmundjen e Alzheimerit dhe vdiq në vitin 2009. Presidenti George W. Bush emëroi gjyqtarin Samuel Alito për ta zëvendësuar atë.
Ndër vendimet e saj historike ishin vota vendimtare që nominoi në mënyrë efektive George W. Bush-in për president pas zgjedhjeve të vitit 2000 dhe rasti Planned Parenthood kundër Casey i vitit 1992, për të drejtën e grave për abort. Ironikisht, pasardhësi i saj, Samuel Alito, ishte bashkëautor i vendimit të shumicës në vitin 2022 që e përmbysi atë të drejtë.
