Departamenti Amerikan i Shtetit, ka publikuar një raport për vitin 2021 në Kongres, në përputhje me seksionin e 5-të të Aktit për Parandalimin e Gjenocidit dhe Mizorive.

Në këtë raport, thuhet se Administrata e presidentit Biden është e përkushtuar në promovimin e vlerave demokratike që mbështesin një sistem të qëndrueshëm ndërkombëtar kritik për lirinë, prosperitetin dhe paqen.

Në raportin e DASh përmendet edhe mbështetje që ShBA-ja po iu jep Dhomave të Specializuara të Kosovës, ku theksohet gjykimi e të akuzuarve, përfshirë edhe ish-presidentin Hashim Thaçi.

“Shteti ka mbështetur Dhomat e Specializuara të Kosovës, të cilat kanë filluar gjykimin e individëve, përfshirë ish-presidentin Hashim Thaçi për krime kundër njerëzimit dhe krime lufte. Shteti mbështeti proceset e drejtësisë tranzicionale në Kolumbi, përfshirë aksesin për pjesëmarrjen e viktimave.”

“Në prill 2021, ish-komandantët e FARC njoftuan se do të pranonin gjetjet faktike të juridiksionit special të Kolumbisë për Paqen dhe do të pranonin përgjegjësinë për akuzat e krimeve të luftës dhe krimeve kundër njerëzimit. Në Prill 2021, Presidenti Biden njohu gjenocidin armen të epokës Osmane”, thuhet në raport.

Shtëpia e Bardhë zotohet se do të mbrojë të drejtat e njeriut në të gjithë botën dhe pranon që parandalimi i mizorive është një interes thelbësor i sigurisë kombëtare dhe një përgjegjësi thelbësore morale.

Bazuar në këtë rast, ambasada amerikane në Kosovë, shkruan se shteti amerikan mbështet përpjekjet e drejtësisë tranzicionale të drejtuara nga Kosova, përfshirë punën e Zyrës së Prokurorit Special të Kosovës dhe Dhomat e Specializuara.

“Parandalimi dhe përgjigjja e mizorive globale nuk është vetëm një përparësi e sigurisë kombëtare të SHBA, por një domosdoshmëri morale. Shtetet e Bashkuara mbështesin përpjekjet e drejtësisë tranzicionale të drejtuara nga Kosova, përfshirë punën e Zyrës së Prokurorit Special të Kosovës dhe Dhomat e Specializuara”, thuhet në postimin e kësaj ambasade./Gazeta Sinjali/