Shtetet e Bashkuara janë shprehur të shqetësuara me njoftimin e Agjencisë Kombëtare të Sigurisë Kibernetike dhe të Informacionit në Republikën e Çekisë, për një “kërcënim të sulmeve serioze në internet” ndaj sektorit të kujdesit shëndetësor.

“Ndërsa bota lufton me pandeminë COVID-19, aktiviteti keqbërës kibernetik, që dëmton aftësinë e spitaleve dhe sistemeve të kujdesit shëndetësor për të ofruar shërbime, mund të ketë rezultate vdekjeprurëse”, thuhet në reagimin e Sekretarit amerikan të shtetit, Mike Pompeo.

Të premten, dy spitale çeke kanë raportuar për sulme kibernetike. Një spital universitar në qytetin lindor, Ostrava ka thënë më 17 prill se ka ndalur një sulm kibernetik gjatë natës në një nga serverët e tij, derisa, spitali në Olomouc ka thënë se ka vërejtur aktivitet të dyshimtë.

Një ditë më parë, autoritetet kombëtare për sigurinë në internet shpallen një paralajmërim në lidhje me sulmet e mundshme në internet – në spitale dhe objektiva të tjerë të rëndësishëm – duke njoftuar një varg rekomandimesh gjithëpërfshirëse për pajisjet që mund të jenë në rrezik.

Në reagimin e Shteteve të Bashkuara, thuhet se “kushdo që angazhohet në veprime të tilla, duhet të pres edhe pasojat”.

“Ne i bëjmë thirrje vepruesit në fjalë të përmbahet nga kryerja e aktivitetit shkatërrues keqbërës kundër sistemit të kujdesit shëndetësor të Republikës Çeke, ose infrastrukturës së ngjashme diku tjetër”, thuhet në reagimin, ku iu bërë thirrje shteteve “që të mos mbyllin sytë” ndaj organizatave kriminale ose organizatat e tjera që kryejnë veprimtari të tilla nga territori i tyre.

“Shtetet e Bashkuara kanë zero tolerancë për aktivitetin e keqbërës në internet të krijuar për të minuar përpjekjet e SHBA-së dhe partnerëve ndërkombëtarë për të mbrojtur, ndihmuar dhe informuar publikun gjatë kësaj pandemie globale. Një veprimtari e tillë kundër infrastrukturës së rëndësishme civile është thellësisht e papërgjegjshme dhe e rrezikshme”, thuhet në reagim.

Agjencitë e inteligjencës dhe vëzhguesit e internetit në gjithë botën kanë ngritur shqetësime për rritje të mashtrimeve dhe sulmeve kibernetike nëpër spitale dhe shënjestra tjera, në kohën e pandemisë me koronavirus./Gazeta Sinjali/