Administrata e Joe Bidenit bleu 290 milionë dollarë ilaçe kundër rrezatimit këtë javë, ndërsa presidenti paralajmëroi për “perspektivën e Apokalipsit” që po nxitej nga lideri rus, Vladimir Putin.
Departamenti i Shëndetësisë dhe Shërbimeve Njerëzore (HHS) konfirmoi se furnizimi kryesor i Nplate ishte pjesë e “përpjekjeve të vazhdueshme për të qenë më të përgatitur që të shpëtohet jetë pas emergjencave radiologjike dhe bërthamore”.
Ilaçi – i cili mund të përdoret si tek fëmijët ashtu edhe tek të rriturit – është “miratuar për të trajtuar lëndimet e qelizave të gjakut që shoqërojnë sindromën akute të rrezatimit [ARS] në pacientët e rritur dhe pediatrikë”.
Një sëmundje e tillë e rrezatimit “ndodh kur i gjithë trupi i një personi ekspozohet ndaj një doze të lartë rrezatimi depërtues, duke arritur në organet e brendshme brenda pak sekondash”, raporton nypost.
Simptomat e dëmtimeve të ARS përfshijnë koagulimin e gjakut si rezultat i numërimit të ulët të trombociteve, gjë që mund të çojë në gjakderdhje të pakontrolluar dhe kërcënuese për jetën.
Nplate, i prodhuar nga Amgen me bazë në Kaliforni, stimulon prodhimin e trombociteve nga trupi “për të reduktuar gjakderdhjen e shkaktuar nga rrezatimi”.
Financimi prej 290 milionë dollarësh erdhi nga Projekti BioShield, ligji i vitit 2004 që ofron investime që inkurajojnë kompanitë të “zhvillojnë kundërmasat mjekësore që janë kritike për sigurinë kombëtare”.
