Kryetari i Komunës së Prishtinës, Përparim Rama, ka njoftuar se sezoni i ri në Termokos do të fillojë me kyçje të reja, derisa shtoi se janë bërë përgatitjet që gjithçka të fillojë si duhet në tetor.
Rama ka bërë me dije se gjatë këtyre muajve, kanë kyçur në sistem të ngrohjes 40 mijë qytetarë në 8 mijë e 900 njësi të reja banimi.
Ai po ashtu ka thënë se kanë zgjeruar dhe rehabilituar rrjetin në tetë lagje të kryeqytetit.
“Gjatë këtyre muajve kemi kyçur 40.000 qytetarë në 8900 njësi të reja banimi. Kemi zgjeruar, rehabilituar dhe densifikuar rrjetin në 8 lagje të Kryeqytetit. Mati 1, Arbëri, Dodona, Ulpianë, Qendër, Dardani, Bregu i Diellit, Qafa. Përgatitjet janë bërë që gjithçka të fillojë si duhet në Tetor. Kyçjet e reja do të kontribuojnë në kursim të energjisë dhe ruajtjes së ambientit në mënyrë që të kemi një Prishtinë sa më të gjelbër”, ka shkruar Rama.
