Sekretari i Përgjithshëm i NATO-s, Mark Rutte, ka deklaruar se Aleanca do të ndjekë një qasje “të ashpër, por të matur” për të siguruar që vendet anëtare të përmbushin angazhimet për rritjen e shpenzimeve në mbrojtje.
Duke folur në një aktivitet në Uashington, Rutte theksoi se qeveritë e vendeve anëtare do të përballen me vendime të vështira buxhetore, duke përmendur si shembuj Britaninë e Madhe, Italinë dhe Holandën. Sipas tij, garantimi i sigurisë kombëtare mbetet detyrë prioritare e çdo shteti.
Ai shtoi se një nga temat kryesore të samitit të NATO-s, që pritet të mbahet muajin e ardhshëm në Ankara, do të jetë vlerësimi i planeve të vendeve anëtare për arritjen e objektivit prej 5% të Prodhimit të Brendshëm Bruto deri në vitin 2035. Nga kjo, 3.5% do të shkojë për mbrojtjen bazë, ndërsa 1.5% për infrastrukturë dhe siguri më të gjerë kombëtare.
Deklaratat e Rutte vijnë në një kohë debati të shtuar në disa vende anëtare, veçanërisht në Britaninë e Madhe, ku financimi i ushtrisë ka shkaktuar përplasje politike dhe ndryshime në udhëheqje.
Samiti i NATO-s pritet të jetë vendimtar për përcaktimin e hapave të ardhshëm të aleancës në rritjen e kapaciteteve mbrojtëse dhe forcimin e sigurisë kolektive.
Sinjali – aty ku e vërteta flet para lajmit!
