Kryetari i Odës Ekonomike të Kosovës, Berat Rukiqi ka thënë se pas vendosjes së masave të reja kundër COVID-19 dhe hapjes së të gjithë sektorëve, duhet të miratohet ndihma financiare e premtuar, për bizneset e prekura nga masat e fundit, shkruan Gazeta Sinjali.

Përveç kësaj, Rukiqi kërkon që vera të jetë me sa më pak kufizime, dhe të sigurohet vaksinimi masiv i qytetarëve.

“Masat e reja u miratuan dhe të gjithë sektorët po hapen (siç e kemi paralajmëruar para dy jave). Vazhdojmë të besojmë që hapja e përcjellur me respektim strikt të masave dhe proces paralel të vaksinimit masiv të qytetarëve është zgjidhja e vetme e qëndrueshme, në menaxhimin e pandemisë”, shkroi ai.

“Përndryshe, punë profesionale nga shoqata e gastronomeve dhe rrjeti i shitësve me pakicë në sigurimin e kushteve optimale për punën e këtyre sektorëve, me masat që do të zbatohen në vijim“, ka shkruar Rukiqi në Facebook.

Sipas tij, tash duhet që:

– Masat të respektohen nga operatoret ekonomik, që verën ta presim me sa me pak kufizime;

– Të miratohet sa me shpejt, ndihma financiare e premtuar, për bizneset e prekura nga masat e fundit;

– Të sigurohet vaksinimi masiv i qytetarëve, si një ndër parakushtet bazë për rimëkëmbje të ekonomisë.

-Mbani distancën, vendoseni maskën ashtu si kërkohet. /Gazeta Sinjali/