Në një dokument politikash që do të miratohet të mërkurën (18 maj), Komisioni Evropian u kërkon vendeve anëtare të BE-së që të shtojnë përgatitjet për një “ndërprerje të plotë të furnizimit me gaz rus” duke marrë parasysh masat emergjente si një kufi i përkohshëm në çmimet e gazit, njofton Euractiv.
Pasi Rusia ndërpreu furnizimin me gaz për Poloninë dhe Bullgarinë në prill, Komisioni po u kërkon vendeve anëtare të BE-së të përgatiten për një “shok furnizimi” në shkallë të plotë.
Gazi natyror është tregtuar me rreth 100 €/MWh që nga mesi i marsit, një rritje shtatëfish në krahasim me çmimet mesatare afatgjatë, me ngritje të herëpashershme në 200 €/MWh, të shkaktuar kryesisht nga mungesa e furnizimeve nga Rusia. Kjo ka çuar në një rritje të çmimeve të energjisë elektrike, e përcaktuar kryesisht nga prodhimi rezervë i energjisë nga termocentralet me gaz.
Dhe ndërsa masat e mëparshme të miratuara në vjeshtë ishin kalibruar për të adresuar një situatë me çmime të larta të qëndrueshme të gazit, “një grup i ndryshëm masash mund të bëhet i vlefshëm për t’u marrë në konsideratë në rast të një ndërprerjeje të papritur në shkallë të gjerë apo edhe të plotë të furnizimit me gaz rus që çon në çmimet e padurueshme të larta të gazit dhe furnizimi i pamjaftueshëm i gazit”, thotë ekzekutivi i BE-së në draft dokumentin e politikës.
