Të mërkurën agjencia e lajmeve, Reuters, ka raportuar për fillimin e gjykimit të parë të Dhomave të Specializuara të Kosovës, duke paraqitur të dhëna për krijimin e kësaj gjykate dhe për të akuzuarit.
Të mërkurën u hap gjyqi i parë në një gjykatë speciale që merret me krimet gjatë luftës në Kosovë gjatë viteve 1998-1999, shkruan Reuters, përcjell Gazeta Sinjali.
Gjykata e Dhomave të Specializuara të Kosovës u krijua në vitin 2015 për të trajtuar krimet që nuk gjykoheshin nga Gjykata Penale Ndërkombëtare e Kombeve të Bashkuara për ish-Jugosllavinë (ICTY), e cila ndoqi individë për mizori gjatë luftërave ballkanike të viteve 1990, dhe u mbyll në 2017.
Tribunali ndodhet në Hagë, përbëhet nga gjyqtarë dhe avokatë ndërkombëtarë, por zyrtarisht është një gjykatë e Kosovës e përfshirë në ligjin e Kosovës.
Rasti i parë është kundër Salih Mustafës, 50 vjeçar, ish-komandant pro pavarësisë i cili u deklarua i pafajshëm të mërkurën për krime lufte.
Ai përballet me akuza për vrasje, i akuzuar për drejtimin e një njësie burgu ku të burgosurit u nënshtroheshin rrahjeve dhe torturave të përditshme.
Prokurorët thanë se viktimat ishin shqiptarë të tjerë të Kosovës që nuk pajtoheshin politikisht me luftëtarët e Ushtrisë Çlirimtare të Kosovës.
Dhomat e Specializuara të Kosovës (DhSP) ka paditur tetë të dyshuar, të gjithë ata janë në paraburgim në një njësi paraburgimi në qytetin bregdetar holandez të Scheveningen. Ndër ta edhe ish -presidenti i Kosovës Hashim Thaçi, i cili dha dorëheqje nga posti vitin e kaluar për t’u përballur me akuzat për krime lufte dhe krime kundër njerëzimit.
Prokurorët e konsiderojnë Thaçin përgjegjës për gati 100 vrasje të civilëve gjatë luftës kur ai ishte komandant i UÇK -së që luftoi policinë dhe ushtrinë serbe.
Thaçi, një hero kombëtar i mbështetur nga ShBA, filloi karrierën e tij politike pasi udhëhoqi betejën e UÇK-së kundër forcave nën Millosheviç. Ai ka qenë figura dominuese politike në vend që nga pavarësia e tij 13 vjet më parë.
Të paktën 13,000 njerëz vdiqën gjatë luftës 1998-99 në Kosovë, atëherë një krahinë e Serbisë nën Presidentin e ndjerë jugosllav Slobodan Millosheviç. /GazetaSinjali/
