Ministrja e Punëve të Jashtme, Donika Gërvalla, ka reaguar në lidhje me raportimin e mediumit demokracia.com, të cilët pretendojnë se dy këshilltarët e saj, kanë shpenzuar 1 mijë e 30 euro, për të shfrytëzuar Terminalin VIP në aeroport të Vjenës.
Ministrja Gërvalla, ka mohuar tërë këto pretendime, duke thënë se këshilltarët e saj nuk kanë shfrytëzuar terminale VIP, shkruan Gazeta Sinjali.
Gërvalla këtë reagim e bëri përmes Facebook-ut, duke thënë se plasimi i shpifjeve për të dhe ekipin e saj është kthyer në fenomen.
“Plasimi i shpifjeve lidhur me mua, punën time dhe të ekipit tim është kthyer në një fenomen të rëndomtë në një pjesë, fatmirësisht të kufizuar, të portaleve në Kosovë. Reagimet e mia janë shumë të rralla edhe për faktin që këto shpifje nuk po i besojnë madje as ata „gazetarë“ që i botojnë ato“, ka shkruar ministrja Gërvalla.
Ai tutje shtoi se, këta “gazetarë”, siç i quan ajo, po keqpërdorin dokumente të vjedhura nga komunikimi i MPJD-së dhe duke gënjyer rreth përmbajtjes së tyre, ata po përpiqen të krijojnë përshtypje që ka plasur hajnia dhe keqpërdorimi në Ministri të Punëve të Jashtme dhe Diasporës.
Kryediplomatja ka thënë se këshilltarët s’kanë marrë asnjëherë shërbime në terminalet VIP, duke e cilësuar këtë gjë si gënjeshtër të kulluar.
“Shpifja e radhës titullohet është e portalit demokracia.com dhe titullohet: „Këshilltarët e Gërvallës për një orë në Terminalin VIP ia harxhojnë shtetit 1 mijë e 30 euro“Është thjesht gënjeshtër e kulluar që këshilltarët e mi i paskan harxhuar shtetit para për të marrë shërbime në terminalin VIP në aeroportin e Vjenës. Dokumenti i botuar si „dëshmi pagese“ titullohet me fjalën „Angebot“, që do të thotë ofertë, pra jo faturë. Një ofertë e tillë nuk është pranuar asnjë herë dhe prandaj kostoja e shkaktuar është 0,00 Euro. Këshilltarët e mi asnjëherë nuk marrin shërbime në terminalet VIP jashtë shtetit. Ata përkundrazi bien në sy për modestinë, mirësjelljen dhe zellin e tyre për të kryer sa më shumë punë të mira në një ambient aspak të lehtë“, ka shkruar Gërvalla.
Ajo po ashtu ka thënë se pret reagim nga Asociacioni i Gazetarëve të Kosovës.
“Me shumë përgjegësi e them që paranë publike nuk e kam shpërdoruar as dje, as sot dhe as nuk e kam në plan as për të ardhmen. Brenda mundësive të mia përpiqem në pozicionin që kam, me përgjegësi, punë, përkushtim, dinjitet dhe ndershmëri të jap maksimumin për të çuar përpara institucionin që drejtoj dhe për ta pozicionuar Kosovën çdo ditë pak më mirë në arenën ndërkombëtare. Në pritje edhe të një reagimi edhe të Asociacionit të Gazetarëve të Kosovës, ju përshëndes të gjithëve dhe ju uroj një fundjavë të këndshme”, ka shkruar Gërvalla.
