Kryeministri i Shqipërisë, Edi Rama i cili është duke zhvulluar turin e tij, e që momentalisht ndodhet në Mal të Zi, është pyetur sërish për mungesën e një takimi me kryeministrin e Kosovës, Albin Kurti gjatë qëndrimit të tij të djeshëm në Kosovë dhe nëse mungesa e tij e ndryshon marrëdhënien e qeverive Kosovë-Shqipëri.
Ai tha se në Prishtinë erdhi si kryeministër i Shqipërisë dhe jo “për t’u martuar me Albinin”, derisa tha se nuk ndihet i fyer që Kurti s’e priti në takim.
“Unë nuk shkova në Prishtinë për t’u martuar me Albinin dhe nuk ndihem i fyer si një dhëndër që nusja nuk i doli në takim. Unë në Prishtinë siç erdha edhe këtu për të pasë takime si kryeministër i Shqipërisë dhe në mënyrën më absolute s’kam asnjë problem personal e aq më pak problem institucional me kryeministrin e Kosovës. Kam vetëm mendime të kundërta me një situatë të caktuar”.
Rama shtoi po ashtu se këtë situatë po e përjetojnë të dy, por se në mënyra të ndryshme.
“Unë e trajtoj si një situatë që duhet ta trajtojmë së bashku, duke u ulur dhe biseduar, Albini e trajton si një situatë që duhet ta trajtojë pa u takuar dhe pa biseduar dhe është në të drejtën e tij”, tha kryeministri i Shqipërisë, Edi Rama.
