Kryetari i Listës Serbe, Goran Rakiq, nënkryetari Igor Simiq dhe Kryetari i Mitrovicës  së Veriut, Milan Radojeviq, kanë zhvilluar sot një takim me anëtarët e Këshillit Evropian për Marrëdhëniet me Jashtë, ku thanë se Kosova duhet t’i zbatojë marrëveshjet që tashmë janë nënshkruar, e veçanërisht atë për formimin e Asociacionit të Komunave me Shumicë Serbe.

Sipas ministrit për Kthim dhe Komunitete në Qeverinë e Kosovës, Goran Rakiq, themelimi i asociacionit nuk është një tekë e Listës Serbe, por një detyrim ndërkombëtar, përmbushjen e të cilit, sipas tij, e ka garantuar vet Bashkimi Evropian.

“Marrëveshjet e Brukselit duhet të zbatohen, sepse ato janë nënshkruar, ato obligojnë gjithçka, dhe sepse kjo është mënyra e vetme që ne mund të arrijmë kushte më të mira jetese dhe t’i ndërtojmë njëri-tjetrit besimin që na nevojitet sot”, thuhet në kumtesën e Listës Serbe.

Më tej, në këtë takim është diskutuar edhe për operacionet e Njësisë Speciale të Kosovës në veri të vendit, të cilat u cilësuan si veprime kundër popullit serb dhe të rrezikshme, të papranueshme dhe joproduktive, sepse sipas tyre, shkaktimi i frikës dhe trazirave mund të kërcënojë edhe më tej situatën e sigurisë.

“Theksohet se Lista Serbe mbështet dialogun si mënyrë themelore për zgjidhjen e të gjitha problemeve dhe çështjeve të hapura, sepse dialogu është e vetmja rrugë dhe vendi ku mund të zgjidhen këto çështje dhe kërkon që të gjithë, veçanërisht nga Bashkimi Evropian të bëjnë gjithçka”, thuhet në reagimin e Listës Serbe./Gazeta Sinjali/