Rusia raportohet se të shtunën ka goditur me raketa hipersonike Ukrainën, duke bërë që kjo të jetë hera e parë që këto armatime përdoren në luftime.
Arma hipersonike e quajtur ‘Kinzhal’ u përdor për të shkatërruar një depo ushtarake të nëndheshme në Ukrainën perëndimore dhe kjo raketë ka një rreze veprimi rreth 2 mijë kilometra, shpejtësi maksimale deri në 12 mijë e 350 km/orë e me një peshë deri në 4 mijë e 300 kg.
Nëse ajo niset nga kufiri më perëndimor i Rusisë, me një rreze veprimi prej 2 mijë kilometra e me shpejtësi 12 mijë e 350 km/orë ajo mund të arrijë në qendrën e NATO-s, Bruksel, për më pak 10 minuta.
‘Kanzhel-i’ rus, raketa supersonike ka një gjatësi prej 8 metrave ndërsa diametri i saj është një metër, por siç raporton Independent, rusët po bëjnë deklarata mashtruese rreth kësaj rakete, duke e quajtur si supersonike, sepse pothuajse të gjitha raketat balistike arrijnë shpejtësi deri në 5 Mach (6 mijë e 125 km/orë).
Disa burime thanë për CNN se bombardimi me raketa hipersonike u bë më tepër për të testuar armën e re dhe për t’i treguar Perëndimit kapacitetet ushtarake të Rusisë.
Ndryshe përdorimin e këtyre armëve për herë të parë në një luftë e kanë konfirmuar edhe zyrtarë të Shteteve të Bashkuara të Amerikës, të cilët thonë se kanë mundur të gjurmojnë goditjet teksa ndodhnin.
