Linjat ajrore dhe aeroportet evropiane i kanë bërë thirrje Komisionit Evropian që të pezullojë përkohësisht sistemin e ri biometrik të kontrollit kufitar gjatë sezonit kulmor të pushimeve verore, duke paralajmëruar se pritjet e gjata në kufi po shkaktojnë kaos në aeroporte dhe po ndikojnë në funksionimin e fluturimeve.
Në një letër drejtuar presidentes së Komisionit Evropian, Ursula von der Leyen, organizatat ACI Europe, Airlines for Europe (A4E) dhe Shoqata Ndërkombëtare e Transportit Ajror (IATA) kanë kërkuar që aeroporteve t’u lejohet pezullimi i përkohshëm i kontrolleve biometrike kur numri i udhëtarëve tejkalon kapacitetet e pikave kufitare.
Sipas tyre, pasagjerët po përballen me pritje deri në pesë orë në kontrollet kufitare, ndërsa disa janë detyruar të presin jashtë terminaleve ose në pistat e aeroporteve për shkak të pamundësisë së autoriteteve kufitare për të përballuar fluksin e madh të udhëtarëve.
Përveç radhëve të gjata, disa avionë janë vonuar në nisje në pritje të pasagjerëve që kanë mbetur në kontrollet kufitare, ndërsa të tjerë janë detyruar të nisen me vende të zbrazëta.
Sistemi i ri, i cili po zbatohet gradualisht që nga tetori i vitit të kaluar, kërkon që shtetasit e vendeve jashtë Bashkimit Evropian të regjistrojnë gjurmët e gishtërinjve dhe fotografinë e tyre në aeroportin e mbërritjes.
Megjithatë, zbatimi i tij është shoqëruar me vështirësi në disa shtete. Greqia ka pezulluar kontrollet biometrike për udhëtarët britanikë deri në shtator, për të shmangur bllokimet gjatë sezonit veror. Në maj, policia franceze ndërpreu përkohësisht kontrollet shtesë në portin e Doverit, ndërsa javën e kaluar drejtuesit e aeroporteve të Romës paralajmëruan se mund ta pezullojnë sistemin edhe për udhëtarët nga vendet jashtë BE-së, me qëllim shmangien e një krize gjatë verës.
Organizatat e sektorit paralajmërojnë se pritjet e gjata në kufi po bëjnë që disa udhëtarë ndërkombëtarë të rishqyrtojnë planet për të vizituar Evropën, duke rrezikuar turizmin dhe reputacionin e Bashkimit Evropian si destinacion udhëtimi.
Sipas tyre, aeroportet evropiane pritet të përpunojnë rreth 40 milionë pasagjerë më shumë gjatë muajve korrik dhe gusht, krahasuar me dy muajt e mëparshëm, çka pritet ta rrisë edhe më tej presionin mbi sistemin kufitar.
Për këtë arsye, sektori i aviacionit kërkon që pezullimi i përkohshëm i kontrolleve biometrike të mbetet një opsion derisa autoritetet të sigurojnë personel të mjaftueshëm dhe pajisjet automatike të funksionojnë në mënyrë të besueshme.
Sinjali – aty ku e vërteta flet para lajmit!
