image Presidenti i Kroacisë i reagon Vuçiqit: Jeni zot i një shteti të pasuksesshëm - Sinjali

Presidenti i Kroacisë i reagon Vuçiqit: Jeni zot i një shteti të pasuksesshëm

news image

Ndërtimi i kampit ushtarak në Kosovë nga Kroacia ka nxitur reagime të ashpra në Serbi, madje, është parë edhe si provokim nga ana e Kroacisë.

Presidenti kroat, Zoran Milanoviq i është përgjigjur presidentit serb Aleksandar Vuçiq, duke theksuar fillimisht se ky nuk është aspak provokim, pasi ky i fundit e vlerësoi të tillë. Sipas tij, ky veprim i Kroacisë në Kosovë nuk është kurrfarë provokimi ndaj Serbisë, ndërsa shtoi se Serbia nuk po di si të dalë nga gracka në të cilën ka rënë 30 vjet më parë në Kosovë.

Nuk është ky kurrfarë provokimi për Serbinë. Ata vetë nuk dinë si të dalin nga gracka në të cilën ranë 30 vjet më parë, nga orgjia e Millosheviqit në Kosovë, e cila çoi në luftë. Është kjo një mënyrë që të mbajnë votuesit e tyre në tension. Ata pësuan më shumë dëme edhe se Kroacia. Aq sa nuk u zhvillua Gjakova, po aq edhe Paraqini mbeti në vitet e ’80-ta”, u shpreh mes tjerash presidenti kroat.

Milanoviq tha se Vuçiq po e drejton një vend të pasuksesshëm, me të cilin nuk po di çfarë të bëjë.

“Vuçiqi është zot i një shteti që nuk është i suksesshëm, i cili nuk di çfarë të bëjë me veten e vet. Bëjnë gjithçka që të mos hyjnë në BE, por negociojnë”, theksoi presidenti kroat, Zoran Milanoviq.

Ministri i jashtëm kroat, Gordan Grlic Radman tha se Kroacia do ta ndihmojë Kosovën edhe në aspektin e mbrojtjes. Ky shtet pritet të ndërtojë bazë ushtarake në Kosovë.

Këtë e ka bërë të ditur vetë ministri kroat në takim me Gërvallën, i cili tha se ky projekt synon të rris sigurinë në rajon.

“Kemi marrë vendim për ngritjen e kampit ushtarak në Kosovë që do të ndikojë në stabilitet të rajonit”, tha Grlic Radman. /Gazeta Sinjali/


Shpërndaje artikullin