Polonia ka propozuar që Bashkimi Evropian të zbatojë një ndalim total të tregtisë me Rusinë, tha kryeministri polak, Mateusz Morawiecki, në një deklaratë të raportuar nga Reuters.
“Polonia po propozon të shtojë një bllokadë tregtare në këtë paketë sanksionesh sa më shpejt të jetë e mundur, përfshirë të dy portet e saj detare… por edhe një ndalim të tregtisë tokësore. Ndërprerja e plotë e tregtisë së Rusisë do ta detyronte më tej Rusinë të konsideronte nëse do të ishte më mirë të ndalonte këtë luftë mizore”, tha Morawiecki, shkruan The Guardian.
Thirrja e Polonisë që Moska të përballet me pasoja më të ashpra ekonomike për pushtimin e saj në Ukrainë vjen pasi vendet anëtare të BE ranë dakord për një paketë të katërt sanksionesh kundër Rusisë këtë javë.
Detajet nuk u zbuluan, por presidenca franceze tha se statusi tregtar i “kombit më të favorizuar” të Rusisë do të revokohej.
