image Petkoviq takohet me ambasadorin gjerman, flasin për mosmarrëveshjen për rrymën në veri të Kosovës - Sinjali

Petkoviq takohet me ambasadorin gjerman, flasin për mosmarrëveshjen për rrymën në veri të Kosovës

news image

E ashtuquajtura Zyra për Kosovën në Qeverinë e Serbisë ka njoftuar se Petar Petkoviq është takuar sot me ambasadorin gjerman, Thomas Schieb. Sipas njoftimit, “Petkoviq e ka informuar atë për problemet në zbatimin e marrëveshjeve për energji të viteve 2013 dhe 2015, dhe për obligimet e Prishtinës përkitazi me regjistrimin e dy kompanive serbe dhe licencimin e tyre për furnizim, shpërndarje dhe shitje të energjisë”.

Petkoviq ka thënë se për të gjitha problemet në atë proces e ka informuar Bashkimin Evropian, si ndërmjetës në dialog dhe si garantues të zbatimit të marrëveshjes, ka njoftuar kjo zyrë.

“Është e rëndësishme që të gjithë faktorët relevantë ndërkombëtarë të kuptojnë seriozitetin e situatës në të cilën aktualisht gjendemi, dhe të kuptojnë që veprimet e njëanshme të Prishtinës mbi këtë çështje mund të rrezikojnë situatën e sigurisë”, ka theksuar Petkoviq.

Qytetarët e Mitrovicës së Veriut, Leposaviqit, Zubin Potokut dhe Zveçanit që nga viti 1999 nuk paguajnë rrymën dhe ujin. Sipas llogaritjeve, ky borxh kap vlerën prej 8 milionë euro në vit.

Nga viti 1999 deri në vitin 2017, këtë borxh e kanë paguar qytetarët e Kosovës, nga komunat tjera, duke pasur faturat e tyre më të shtrenjta për 3.5 për qind. Pas ankesave, Gjykata e Apelit ka vendosur të pezullojë këtë praktikë, sepse ka qenë e paligjshme.

/GazetaSinjali/


Shpërndaje artikullin