image Përplasje mes Vitisë dhe Ismailit për kompetencat e kryetarit të komunës - Sinjali

Përplasje mes Vitisë dhe Ismailit për kompetencat e kryetarit të komunës

news image

Kandidatët për kryetar të Prishtinës, Arben Vitia nga Lëvizja Vetëvendosje dhe Uran Ismaili nga Partia Demokratike e Kosovës, janë përplasur për kompetencat e kryetarit të komunës.

Kjo përplasje nisi kur po diskutohej për shfrytëzimin e pronave publike të kryeqytetit dhe ankandin për dhënien në shfrytëzim të tyre.

Ismaili tha se duhet pranuar problemet që janë në Prishtinë, si edhe për temën e pronave. Ai shtoi se nuk ka qenë ministër për prona, por për për t’i rregulluar stentat, në kohën kur ka drejtuar Ministrinë e Shëndetësisë.

“Ministër nuk kam qenë për prona, ministër kam qenë për me i rregullu stentat, e kam ndalë korrupsionin. Pronat qysh janë ndërruar unë po pyes shumë thjesht: A janë ndërru pronat në mes pronarëve të ndryshëm për qëllime të ndërtimit privat? ”, tha Ismaili në “Debat Pernime”.

Më pas Vitia tha se kryetari e ka për obligim të bëjë politika.

“Keni qenë ministër z. Ismaili jo për t’i rregulluar stentat, që çdo herë edhe këtu po i përzien politikat dhe atë se çka duhet të bëjë kryetari me atë çka duhet të bëjnë ekspertët. Domethënë kryetari bën politika, urbanisti bën plane, ministri bën politika, rregullimin e bëjnë drejtorët në ShSKUK dhe profesionistët shëndetësor”, u shpreh ai.

Por Ismaili ia ktheu atij, duke shtuar se këtu ai ka një dallim të madh me të tjerët.

“Unë e konsideroj veten ministër praktik dhe kryetar praktik. Unë nuk rri në zyrë, as atëherë nuk kam nejt në zyrë. Unë e di çka janë politikat sepse e kam kryer një shkollë për atë punë. Por e di çka është implementimi”, tha ai.

Sonte, për herë të parë, kandidatët për kryetar të Prishtinës debatojnë mes vete në #DebatPernime.

/GazetaSinjali/


Shpërndaje artikullin