Gjashtë raste të dhunës në familje janë raportuar në Polici përgjatë festave të Vitit të Ri, shkruan Gazeta Sinjali.

Në rajonin e Prishtinës janë raportuar katër raste të dhunës, ndërkohë rastet e tjera kanë ndodhur në Shtime dhe Prizren.

Rasti i parë ka ndodhur në Fushë Kosovë në ditën e Vitit të Ri, ku personi i cili dyshohet se ka sulmuar fizikisht bashkëshorten e tij është arrestuar. Me vendim të prokurorit i njëjti është dërguar në mbajtje.

Rasti i dytë ka ndodhur dje në qytetin e Drenasit, ku dyshohet se pas një mosmarrëveshje një person e ka sulmuar fizikisht bashkëshorten e tij. Me këtë rast viktima ka pësuar lëndime trupore, ku e njëjta është dërguar për trajtim mjekësor. Ndërkohë, i dyshuari është arrestuar dhe i është sekuestruar një pistoletë.

Rasti tjetër ka ndodhur në kryeqytet, ku një grua ka raportuar në Polici se vazhdimisht bashkëshorti i saj është duke ushtruar dhunë fizike ndaj saj. Policia bën të ditur se palët janë intervistuar dhe me vendim të prokurorit i dyshuari është dërguar në mbajtje, ndërsa viktima është rikthyer në familjen e saj.

Rastin i katërt ka ndodhur në qytetin e Lipjanit, ku një person ka përfunduar në prangat e policisë, pasi që i njëjti pas një mosmarrëveshje dyshohet se ka ushtruar dhunë fizike ndaj bashkëshortes së tij. I dyshuari me vendim të prokurorit është dërguar në mbajtje, njofton Gazeta Sinjali.

Ndërkohë, rasti i dhunës në familje në Shtime sipas policisë është cilësuar edhe “Lëndim trupor”, pasi që një person dyshohet se kishte ushtruar dhunë fizike ndaj bashkëshortes së tij, derisa edhe i ka shkaktuar lëndime. Policia ka bërë të ditur se i njëjti e kishte larguar nga shtëpia viktimën dhe vajzat e saj. I dyshuari me vendim të prokurorit pas intervistimit është dërguar në mbajtje.

Ndërkaq, rasti i fundit ka ndodhur në Prizren me datë 30 deri më 1 janar, ku një vajzë ka pranuar tretman mjekësor, pasi që e njëjta pas një mosmarrëveshje është sulmuar fizikisht nga babai i saj./GazetaSinjali/