Kompania “Pastrimi” ka paralajmëruar rritjen e faturave të mbeturinave.
Nga kjo kompani e arsyetojnë rritjen e faturave për shkak të çmimeve të larta të të gjitha produkteve.
Sindikata e Punëtoreve të Pastrimit ka kërkuar nga Komuna e Prishtinës, që nga 4.70 çmimi të rritet në 7.50 euro.
Kompania “Pastrimi”, ka bërë kërkesë ndaj Komunës së Prishtinës që të miratojë rritjen e faturës së mbeturinave.
Arbnora Ademi, zëdhënëse për media në këtë kompani, i tha Radio Kosovës se kjo kërkesë ka ardhur për shkak të rritjes së çmimeve të derivateve e të produkteve të tjera. Mirëpo, ajo nuk dha detaje se sa pritet të rritet fatura.
“Kompania “Pastrimi” tash e sa kohë është duke bërë kërkese e thirrje te komunat ku ne kryejmë shërbime, për rritje të faturës. Kjo kërkesë vjen duke e ditur koston e lartë të derivateve e të çdo produkti që është rritur e në anën tjetër faturat e mbeturinave mbetet e njëjtë. Mirëpo nuk ka ende përgjigje zyrtare për rritje të faturës”, tha Ademi.
Sindikata e Punëtorëve të Pavarur të Kompanisë “Pastrimi” në një email dërguar kryetarit të Komunës, Përparim Rama, ka shfaqur problemet me të cilat është duke u përballur kjo kompani gjatë operimit. Ata kanë kërkuar ndryshim të vlerës së faturave për amvisëritë në territorin e Komunës së Prishtinës, nga 4.70€, në 7.50€.
“Shpenzimet e larta operative, gjendja financiare, efektet e inflacionit me të cilën jemi duke u përballur, na ka sjellë pranë kolapsit, andaj e vetmja shpresë për 890 familje jeni ju”, shkruan në emailin e sindikatës drejtuar Komunës së Prishtinës.
E drejtori i Shërbimeve Publike në Komunën e Prishtinës, Ilirik Musliu, përmes një përgjigje me shkrim, i tha Radio Kosovës se “Ende nuk kemi marrë vendim për ndryshim të çmimit”. Ditë më parë nga komuna kanë bërë të ditur se shtrenjtimi i faturës se mbeturinave pritet të ndodhë për shkak se Deponia i ka rritur çmimet karshi Kompanisë “Pastrimi”.
