Kryeministri Edi Rama ka reaguar sërish për çështjen e Fredi Belerit, në përgjigje të një rezolute të paraqitur nga partia greke Neo Demokratia në asamblenë politike të Partisë Popullore Evropiane, ku thuhet se ‘i bëjmë thirrje autoriteteve shqiptare të respektojnë rezultatin e zgjedhjeve të Himarës’ dhe të betohet kryetari.
Kreu i qeverisë, nëpërmjet një postimi në rrjete sociale, sqaron se së pari problemi nuk është rezultat i zgjedhjeve të 14 majit, por i gjykatave. Mes të tjerash, kreu i qeverisë shprehet se autoritetet shqiptare janë të gatshme të ofrojnë informacionin e duhur për PPE-në lidhur me çështjen e Fredi Belerit.
Reagimi i kryeministrit Rama:
Interesante! “Ne i bëjmë thirrje autoriteteve shqiptare”… Një thirrje pa specifikuar se për cilat autoritete dhe, me siguri, pa qenë të informuar se në këtë rast problemi nuk është rezultati i zgjedhjeve, por i gjykatave, të cilat e kanë refuzuar një kërkesë të tillë.
E përdora “me siguri” sepse do të ishte vërtetë shqetësuese nëse Partia e madhe Popullore Europiane do të kalonte një rezolutë me titullin “Sundimi i Ligjit” për të kërkuar një rezultat tjetër nga ai që është vendosur nga Prokuroria Speciale për Korrupsionin e Krimin e Organizuar dhe Gjykatat Speciale me të njëjtën emër. Këto institucione u themeluan me mbështetje të plotë nga BE&SHBA dhe ndihmohen ngushtësisht nga SHBA&BE në punën e tyre deri këtu mbresëlënëse kundër korrupsionit dhe krimit të organizuar .
Nëse është e nevojshme, jemi më shumë se të gatshëm të sigurojmë udhëheqjen e lartë të EPP-së me informacion mbi këtë çështje në çdo format dhe në çdo kohë. S’ka dyshim, se të gjitha autoritetet shqiptare e presin me shumë besim mbështetjen e vazhdueshme të EPP-së, si një zë i fortë i Europës sonë gjatë kësaj faze ndryshimi historik për vendin tonë, ku më në fund, zyrtarët e lartë po hetohen me thellësi përtej anësive politike, çka shënon fundin e një epoke të gjatë të pandëshkueshmërisë./abcnews.al
