Dje, në 19-vjetorin e Ditës së Flamurit të komunitetit ashkali, Qazim Rrahmani nga Partia e Ashkalinjve për Integrim ka thënë se nuk kanë pasur përkrahje nga ana e qeverisë për shënimin e kësaj dite.
Ai tha se kjo festë “e gjen të lumtur komunitetin për festën, por jo edhe për kushtet e jetesën në Kosovë”.
“Është ligji për promovimin e të drejtave të komunitetit, sot ka qenë dita jonë nacionale, shteti e ka për obligim të promovojë, të financojë qoftë edhe aktivitetet tona për festën tonë, kjo nuk ka ndodhur në këtë festë e as në të kaluarën, qeveria nuk ka financuar aktivitetet tona për festën tonë nacionale”, ka thënë Rrahmani.
“Qeveria nuk e ka përkrahur ditën e komunitetit ashkali, duhet ta themi publikisht… Me mospërkrahjen e tij, nuk na ka lënë me festu festën qysh duhet”, ka shtuar ai.
Sipas Rrahmanit për një vjet qeverisje, nga qeveria Kurti nuk janë marrë parasysh kërkesat e këtij komuniteti, dhe sipas tij, është ndaluar edhe projekti, që ishte miratuar nga qeveritë e kaluara, për ndërtimin e disa shtëpive, me pretekstin, siç thotë ai, se kishte keqpërdorime të tenderimit.
“Për një vjet qeverisje, kërkesat e komunitetit ashkali nuk ka ecur përpara, janë ndërprerë projekti i shtëpive. Me ardhjen e qeverisë Kurti është ndërprerë ky projekt, arsyeja sipas tyre është se ka pasur keqpërdorim në tenderim, ne nuk e dimë, por njerëzit janë jashtë, edhe shtëpitë që i kanë pasur i kanë prishur duke menduar se kanë me hy në të rejat, tash nuk e kanë asnjërën”, ka vazhduar ai.
“Ose rifillo projektin, ose paguaja qiranë atyre njerëzve”, ka shtuar ai në Klan Kosova.
Madje Rrahmani tha se nëse do të vazhdojë kjo qasje e qeverisë ndaj këtij komuniteti, do ta rishikojnë edhe mundësinë për të dalë nga koalicioni.
“Do ta rishikojmë koalicionin nëse kjo qasje vazhdon kështu, nuk merren parasysh kërkesat e këtij komunitetit”, ka thënë ai.
