Mjeku specialist i leukemisë, Mikkael Sekeres, ka thënë se pacientët me kancer janë pesë herë më shumë të rrezikuar nga COVID-19 se pacientët e tjerë.

Ai ka deklaruar se shanset e infektimit janë të njëjta, por rreziku për t’u sëmurë rëndë te ta është shumë më i lartë.

“Gjithçka që kam lexuar tregon se edhe pse pacientët e mi nuk janë më të cenueshëm se unë apo se ju ndaj kontraktimit të Covid-19, gjasat e tyre që të sëmuren rëndë nëse e kapin virusin, madje edhe të vdesin, janë ndoshta pesë herë më të mëdha se të juajat, të miat apo të dikujt në grup-moshën e njëjtë”, është shprehur Sekeres.

Sekeres ka theksuar se pacientëve të tij me leukemi, edhe para pandemisë, vazhdimisht i ka këshilluar që të kenë kujdes në publik dhe të bartin maskën dhe të përdorin dezinfektues.

“Kur unë flas me pacientët e mi u jap shumë këshilla të ngjashme që u kam dhënë për kohë të gjatë. Secili me sistem të cenueshëm imunitar e di se kur del në publik duhet të veshë maskë, të jetë vazhdimisht i vëmendshëm ndaj gjithçkaje që prek dhe më pas të lajë duart apo të përdorë dezinfektues, si dhe të jetë i kujdesshëm ndaj kontakteve përreth. Pra, këshillat që japim tani për secilin janë të njëjta me ato që u japim njerëzve, të cilëve kanceri ua ka goditur sistemin imunitar”, ka thënë mjeku për REL.

Sekeres, i cili është autor i librit “When blood breaks down – Life lessons from leukemia” [Kur gjaku prishet – Mësime jetësore nga leukemia], po ashtu tërheq vërejtjen se situata e krijuar me koronavirus ka shtyrë diagnostikimet e kancerit, sëmundjes që “është aq e frikshme ose më e frikshme se COVID-19”./ Gazeta Sinjali/