Presidentja, Vjosa Osmani, është intervistuar nga një media kroate, ku ka deklaruar se nëse ushtria serbe provon të kalojë kufirin me Kosovën do të përballen me ushtarët e Shteteve të Bashkuara të Amerikës, të cilët shërbejnë në Kosovë.

Komandantja Supreme e FSK-së është pyetur nëse ka frikë nga konfliktet e armatosura tani kur ushtria serbe po armatoset, Osmani është përgjigjur se nuk e di se çfarë ka në mendje Serbia, por që nëse provojnë të kalojnë kufirin me Kosovën, ata do të përballen me ushtarët e Shteteve të Bashkuara të Amerikës.

“Është e qartë se ushtria serbe e sheh Rusinë si aleatin e saj kryesor, për sa i përket bashkëpunimit ushtarak, por edhe të politikës së asaj ekonomike. Ata e tregojnë atë hapur.“

“Ndërsa vendet në rajon, të tilla si ne ose Kroacia, zhvilluan stërvitjen ‘Defender Europe 21’, së bashku me NATO-n dhe Shtetet e Bashkuara, Serbia organizoi stërvitje ushtarake me Rusinë në të njëjtën kohë. Ishte i vetmi vend në rajon që nuk ishte i pranishëm në stërvitjen ‘Defender Europe 21’ të udhëhequr nga ShBA-ja” ka thënë Osmani.

Presidentja shtoi se kohët e fundit mund të shohim se si ata organizojnë stërvitje ushtarake me Rusinë dhe Bjellorusinë, gjë që tregon orientimin e tyre.

“Nuk jam e sigurt se çfarë kanë në mendje kur bëhet fjalë për retorikën që ata përdorin, por di një gjë shumë mirë: nëse kalojnë kufirin me Kosovën ata do të takohen me ushtarë nga Shtetet e Bashkuara dhe anëtarët e tjerë të NATO-s. Ne nuk jemi vetëm dhe Serbia e di mirë këtë! Ata u përpoqën ta bënin atë një herë në 1999. Nuk mendoj se ata do të dëshirojnë të provojnë përsëri”, ka thënë Osmani për express.hr, përcjell Gazeta Sinjali.

Osmani ka folur edhe për dialogun me Serbinë që po udhëhiqet nga kryeministri Albin Kurti.

Presidentja e vendit tha se Kosova është e qartë se çfarë pret nga finalja e dialogut dhe ajo është njohja e ndërsjellë.

“Unë mendoj se është shumë herët për të gjykuar procesin dhe për të nxjerrë një përfundim të qartë dhe përfundimtar. Por ne jemi shumë të qartë për pritjet tona dhe ato janë identike me ato të theksuara në letrën e dërguar nga presidenti amerikan, Joe Biden. Ajo përcakton qartë se ky proces duhet të ketë për qëllim njohjen e ndërsjellë midis Kosovës dhe Serbisë. Dhe kjo është pikërisht ajo që ne presim”, u shpreh Osmani për median kroate./Gazeta Sinjali/