Varianti i ri i koronavirusit, Omicron ka arritur edhe në Kosovë. Instituti Kombëtar i Shëndetit Publik ka njoftuar se nëntë persona kanë rezultuar pozitiv, shkruan Gazeta Sinjali.
Sipas njoftimit të IKShPK-së, 2 raste janë të importuara nga SHBA-të, 2 nga Londra, 1 nga Franca dhe 4 raste me variantin Omicron të detektuar janë në komunën e Mitrovicës, të cilët mohojnë historinë e udhëtimit dhe se kanë pasur kontakte me dikë nga jashtë.
MSh dhe IKShPK kanë bërë thirrje që të zbatohen masat në fuqi dhe të vaksinohen qytetarët.
Ky variant, në bazë të të dhënave të deritanishme nga bota, ka një përhapje edhe më të shpejtë se varianti Delta Plus, shkruan Sinjali.
Raporti i IKShPK-së
IKSHPK detekton 9 raste të variantit Omicron të SARS-COV-2
Prishtinë, 26 dhjetor 2021 Instituti Kombëtar i Shëndetësisë Publike i Kosovës ka bërë të ditur se, sot, më 26 dhjetor 2021, në laboratorin e Mikrobiologjisë molekulare, Departamenti i Mikrobiologjisë të IKShPK, janë testuar 22 mostra pozitive në SARS-CoV-2, të periudhës kohore 15-25 dhjetor 2021. Nga këto mostra, nëntë (9) prej tyre kanë rezultuar pozitive në prani të variantit Omicron (B.1.1.529). Nga hulumtimi epidemiologjik, ka rezultuar se nga këto raste:
· 2 raste janë të importuara nga SHBA-të, · 2 raste janë të importuara nga Londra, Mbretëria e Bashkuar, · 1 rast është i importuar nga Franca; dhe · 4 raste me variantin Omicron të detektuar janë në komunën e Mitrovicës, të cilët mohojnë historine e udhëtimit dhe se kanë pasur kontakte me dikë nga jashtë. Testimi është kryer me RT PCR dhe kit-e shtesë të pranuar përmes OBSh-së. Pas paraqitjes së variantit Omicron (B.1.1.529) në botë, Evropë, rajon e tashmë edhe në Kosovë, parashikohet që të rëndoj situatën epidemiologjike. Ky variant, në bazë të të dhënave të deritanishme nga bota, ka një përhapje edhe më të shpejtë se varianti Delta Plus.
MSh dhe IKSHPK u bëjnë thirrje qytetarëve që ti zbatojnë me përpikëmëri masat në fuqi dhe që të vaksinohen dhe ti inkurajonë tjerët për vaksinim. Kosova disponon me vaksina të miratuara për përdorim nga trupat më relevant botërorë. Vaksinimi mund të bëhet kurdo, pa termin, pavarësisht vendbanimit e shtetësisë.
