Agjencia e OKB-së për ndihmë dhe punë për refugjatët palestinezë (UNRWA) ka lëshuar raportin e saj të fundit të situatës mbi Gazën dhe Bregun Perëndimor, në të cilin ka thënë se “nuk ka mjaft çanta trupash për të vdekurit në Gaza”.
Në raport thuhet:
Për të pestën ditë radhazi, Gaza nuk ka energji elektrike, duke i shtyrë shërbimet jetike, duke përfshirë shëndetin, ujin dhe kanalizimet në prag të kolapsit dhe duke përkeqësuar pasigurinë ushqimore. Njerëzit në të gjithë Gazën kanë qasje të kufizuar në ujë të pijshëm të pastër.
Mbi një milion njerëz – pothuajse gjysma e popullsisë së përgjithshme të Gazës – janë zhvendosur. 600,000 persona të zhvendosur brenda vendit (PZHBV) janë në zonën e mesme, Khan Yunis dhe Rafah. Prej tyre, gati 400,000 janë në objektet e UNRWA-s – shumë më tepër se kapaciteti ynë për të ndihmuar në çfarëdo mënyre kuptimplote, duke përfshirë hapësirën në strehimoret tona, ushqimin, ujin ose mbështetjen psikologjike.
Raporti thotë “Numri i të vrarëve po rritet. Nuk ka mjaft çanta trupash për të vdekurit në Gaza.”
Agjencia thotë se 14 anëtarë të stafit të UNRWA-s janë vrarë, por “numri ka të ngjarë më i lartë” dhe se ka 23 raporte të konfirmuara se instalimet e UNRWA-s janë prekur nga sulmet ajrore izraelite.
Aty thuhet se “UNRWA ka dërguar një ekip paraprak në Egjipt për t’u përgatitur për hapjen e mundshme të një korridori humanitar për të sjellë furnizime me ndihma humanitare në Rrip”.
