Organizata Botërore e Shëndetësisë të mërkurën ka deklaruar se ka pak prova që tregojnë se ndryshimi i stinëve do të ndikojë në përhapjen e koronavirusit.

“Nuk mund të mbështetemi në pritjet se sezoni ose temperatura do të jenë përgjigjja e kësaj”, tha udhëheqësi i programit të emergjencave në OBSH, Mike Ryan.

“Tani për tani, nuk kemi të dhëna që sugjerojnë se koronavirusi do të sillet në mënyrë më agresive ose jo kur sezoni të ndryshojë”, ka thënë ai.

Në fazat e para të pandemisë së koronavirusit, është thënë se koha e nxehtë mund ta ngadalësojë përhapjen e tij.

Por, kjo ide është zbehur pasi koronavirusi ka vazhduar të përhapet në hemisferën veriore edhe gjatë pranverës.

Ryan po ashtu tha se mungesa e pajisjeve personale mbrojtëse mbetet një çështje madhore në nivel global.

“Sistemet shëndetësore në disa vende janë duke luftuar dhe ndodhen nën presion të madh”, tha ai.

Koronavirusi ka prekur mbi 7.2 milionë njerëz në gjithë botën.

Prej tyre, mbi 3.4 milionë janë shëruar dhe mbi 413,000 kanë vdekur./GazetaSinjali/