Qeveria norvegjeze do t’ia ofrojë Ukrainës 205 milionë dollarë për t’i dalë në ndihmë në blerjen e gazit, raportoi BBC-ja të hënën.
Kryeministri i Norvegjisë, Jonas Har Store, deklaroi se Ukraina ia ka kërkuar këtë ndihmë Norvegjisë, për sigurimin e gazit gjatë dimrit, derisa bëri të ditur se deri në fund të vitit do të ndahen edhe mjete të tjera financiare.
“Kontributi ynë në blerjen e gazit, ndër të tjera, do të ndihmojë në ruajtjen e nxehtësisë në spitalet dhe shkollat e Ukrainës gjatë dimrit, si dhe do të japë më shumë mundësi për të përgatitur ushqim të nxehtë”, deklaroi Har Store, në konferencën “Northern Sea Shelf”, që u mbajt në Norvegji, në të cilën mori pjesë edhe presidenti ukrainas, Volodymyr Zelensky. Ky deklaroi se pavarësia e Evropës nga Rusia në sektorin e energjisë është e një rëndësie të veçantë për tërë evropianët.
“Ne të gjithë e shohim se kërcënimi i krizës energjetike po bëhet real për dhjetëra miliona njerëz në Evropë, të cilët deri vonë mund ta përballonin konsumin normal të energjisë. Të gjithë shohim se çmimi i energjisë është aq i lartë sa mijëra ndërmarrje kanë kaluar në krizë”, theksoi Zelensky.
Sipas tij, Rusia, që e organizoi këtë krizë artificiale me transportuesit e energjisë, po “i përkrah” vendet evropiane të heqin dorë nga vlerat evropiane, në favor të uljes së çmimeve.
“Rusia po e përdor terrorin ekonomik, presionin e krizës së çmimeve dhe varfërinë për ta dobësuar Evropën në një kohë kur fuqia e saj e plotë është e nevojshme për të mbrojtur kundër terrorit në luftën që Rusia ka zhvilluar për më shumë se gjashtë muaj”, tha tutje presidenti ukrainas.
