Gazeta Sinjali mbrëmë publikoi ekskluzivisht një video, ku shihet se si i dyshuari Feim Berisha rrah brutalisht një grua në një pikë të supermarketit “Interex”, në Prishtinë.
Pas pamjeve të publikuara nga Sinjali, Prokuroria Themelore e Prishtinës ka njoftuar se është kërkuar që të caktohet masa e paraburgimit ndaj të dyshuarit.
Prokuroria Themelore në Prishtinë ka njoftuar se Berisha dyshohet se ka kryer veprën penale “Sulmi”, dhe jo veprën penale “lëndim i lehtë trupor”.
Si ndodhi rasti?
Një grua që kishte dalë për të kryer pazarin në supermarketin “Interex”, në Lagjen e Spitalit, përfundoi në spital, pasi që Feim Berisha kishte vendosur të shfrynte nervozizmin e tij tek ajo, shkruan Gazeta Sinjali.
Ndonëse ajo ishte e koncentruar duke shikuar artikujt dhe duke kryer blerje, Berisha i shoqëruar nga gruaja dhe djemtë e tij të mitur, u nervozua se pse karroca e saj ia zuri rrugën dhe filloi ta rrahë brutalisht.
Në një video të siguruar nga Gazeta Sinjali shihet Feimi i cili fillimisht debaton me gruan dhe megjithëse ajo ia liron rrugën, ai fillon ta godasë.
Në sytë e gruas dhe fëmijëve ai e godet pamëshirshëm atë disa herë me karrocë, e më pas fillon ta godasë edhe me grushte.
Ani pse, gruaja e të dyshuarit arrin ta largojë njëherë, ai kthehet sërish dhe vazhdon ta godasë me grushte të panjohurën, derisa aty shkon edhe një konsumator tjetër për t’i ndarë.
Ky rast është raportuar edhe nga Policia e Kosovës në raportin 24-orësh. Policia bën të ditur se i dyshuari është arrestuar dhe ndaj tij është iniciuar rasti “Lëndim i lehtë trupor”.
I njëjti pas arrestimit është dërguar në mbajtje.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.