Jostabiliteti financiar dhe ndërprerja e kohëpaskohshme apo edhe humbja e punës gjatë kohës së pandemisë, i ka dëmtuar qytetarët në shëndetin mendor.

Neurologu Nexhmedin Shala, tha se izolimi që mund të ndikojë në shëndetin mendor në përgjithësi ka ndikim të madh.

“Një virus me shumë ta panjohura që në vete mbart shumë frikë nga numri i madh i vdekshmërisë që ka ky infeksion dhe prekja e sistemit mendor është më e madhe. Secili pacient që shkon për të bërë vaksinim ka një lloj ankthi në vete se çka do të ndodhë. Kështu që problemet mendore janë më madhore që do të na përcjellin mbas një vaksinimi gjithëpërfshirës”, u shpreh ai për EO.

Shala tutje ka treguar edhe për pasojat neurologjike që lë COVID-19, e që sipas tij janë të shpeshta. Ai ka pohuar se pacientët që kanë prekje neurologjike mund të jenë pacientët që kanë dëmtime të sistemit nervor qendror, periferik dhe të aspektit neuro- psikologjik.

Neurologu Shala, tutje është shprehur se virusi efektet e tij i jep indirekt në tru, derisa ka shtuar se mund të ndryshojë probabilitetin e gjakut dhe rritjen e mpiksjes së tij.

“Ekziston një ndërlidhje te ata pacientë që kanë probleme me COVID-19 dhe prekjeve neurologjike që janë të shpeshta. Në këtë aspekt pacientët që kanë prekje neurologjike mund të jenë pacientët që kanë dëmtime të sistemit nervor qendror, periferik dhe të aspektit neuro- psikologjik. Pacientit shfaqin një simptomatologji të përbërë nga sistemi nervor qendror. Dëmtimet e sistemit qendror kanë ato vaskulare për shkak të ngjizjes së sforcuar të gjakut, prekjeve të sinuseve venoz. Covidi efektet e tij i jep indirekt në tru duke ndryshuar probabilitetin e gjakut dhe rritje e mpiksjes së gjakut, dhe problemet me sistemin imunitar”, u shpreh Shala. /Gazeta Sinjali/