Nesër në orët e para të punës në nivel vendi, do të mbahet grevë paralajmëruese një orëshe nga të punësuarit e të gjitha institucioneve.
Kështu ka bërë të ditur Bashkimi i Sindikatave të Pavarura të Kosovës, të cilët përmes një njoftimi i kanë bërë publike hapat për grevën e nesërme.
Ndërkaq kryetari i BSPK-së, Atdhe Hykolli tha se presin që të gjithë punëtorët e sektorëve të ndryshme t’i bashkohen kësaj greve.
“Kryesia ekzekutive e BSPK-së mori vendim që nesër të hymë në një grevë njëorëshe, si paralajmërim për partnerin tonë social që ne të ulemi e të diskutojmë për problemet e sindikatave në Kosovë. Kështu, nesër të gjitha sindikatat federale që janë brenda BSPK-së, si dhe ato që jemi në partneritet, do të solidarizohen me ne për këtë grevë njëorëshe që do të mbahet nesër” tha kryetari i BSPK-së, Atdhe Hykolli për RTK-në.
Ai theksoi se dialogu është i mirëpritur në çdo kohë dhe që janë të gatshëm të bisedojnë për të gjetur zgjidhjen për problemet e shumta të punëtorëve, ndryshe takimin sa për sy faqe, ai e quajti të kotë.
“Dialogu social për ne është shumë i rëndësishëm, sepse kërkesat tona janë shumë të arsyeshme”, theksoi, ndër të tjera, Hykolli.
