Një aeroplan me qytetarë të Kosovës do të kthehet nesër nga Zvicra në Kosovë. Pas kthimit, ata do të vendosen në Qendrën e Studentëve, e cila me vendim të Qeverisë së Kosovës është shndërruar në karantinë.

Lajmin e ka konfirmuar shefi i Kabinetit të ministrit në detyrë të Infrastrukturës, Alban Zogaj.

Ministri në detyrë i Infrastrukturës, Lumir Abdixhiku kishte njoftuar se të gjithë të kthyerit do të vendosen në karantinë 14 ditore në Qendrën Studentore në Prishtinë.

Përmes një postimi në llogarinë e tij në Facebook, Abdixhiku kishte thënë se kthimi i qytetarëve të evidentuar nga ambasadat do të vazhdojë në mënyrë të kujdesshme dhe të organizuar. 

Ai kishte bërë thirrje që qytetarët e ngujuar të vazhdojnë t’i kontaktojnë ambasadat.

“Kthimi i qytetarëve të evidentuar nga ambasadat tona jashtë, në mënyrë të kujdesshme, të organizuar e pa rrezik për qytetarët këtu – do të vazhdojë. Këtë punë do ta bëjmë dhe zhvillimet tjera s’janë brenga e jona tani”, kishte shkruar Abdixhiku.

Instituti Kombëtar i Shëndetësisë Publike të Kosovës ka konfirmuar mbrëmë edhe tetë raste të reja me koronavirus, duke bërë që numri i rasteve në gjithë vendin të shkojë në 71. /Gazeta Sinjali/