Kryetari i Lidhjes Demokratike të Kosovës, Isa Mustafa, i ka kërkuar kryeministrit Albin Kurtit anulimin e vendimit të shkarkimit të Agim Veliut nga posti i ministrit të Punëve të Brendshme dhe Administratës Publike si dhe heqjen e taksës ndaj mallrave serbe dhe boshnjake deri në fund të javës, raporton Gazeta Sinjali.

Këto komente Mustafa i ka bërë në profilin e tij në Facebook.

Postimi i plotë i Mustafës:

Qytetarë të nderuar

Për mua dhe LDK-në është i papranueshëm shkarkimi i Ministrit të Punëve të Brendshme dhe Administratës Publike, z. Agim Veliu.

Kjo është shkelje e Marrëveshjes së koalicionit.

Me marrëveshje kemi përcaktuar se ministrat mund të shkarkohen nga Kryeministri në konsultim me Kryetarin e subjektit politik me të cilin është bërë koalicioni, bazuar në një arsyetim që e pranon Kryetari i LDK-së.

Si kryetar i LDK-së nuk jam konsultuar nga Kryeministri dhe aq më pak i pranoj arsyet e tij te bëra publike.

Kërkoj nga Kryeministri të anuloj vendimin për shkarkimin e z. Veliu dhe të merr vendim per heqjen e taksës deri në fund të javës.

Veprimet e njëanshme të Kryeministrit janë të dëmshme dhe të papranueshme dhe qojnë në prishje të koalicionit. IM