Ministria e Punëve të Jashtme dhe e Diasporës ka njoftuar se ditëve të fundit ka pasur ngarkesë në sistemin e aplikimit për marrjen e letërnjoftimeve dhe pasaportave, shkruan Gazeta Sinjali.
Përmes një komunikate për media është bërë e ditur se për këtë menjëherë ka ndërmarrë të gjitha veprimet e duhura për ta zgjidhur këtë problem.
“Zyra e Sekretarit të Përgjithshëm të MPJD-së ka zhvilluar komunikime intenzive me përgjegjësitë e sektorit për prodhimin e dokumenteve në Ministrinë e Punëve të Brendshme për ta evituar këtë problem sa më shpejtë, në mënyrë që qytetarët dhe mërgimtarët tanë të kryejnë pa probleme procedurat e pajisjes së tyre me letërnjoftim dhe pasaportë të Republikës së Kosovës”, thuhet në njoftim.
“Udhëheqësit e sektorit për prodhimin e dokumenteve në MPB kanë bërë të ditur se bëhet fjalë për një problem të komplet rrjetit qeveritar, i cili ka ndikuar në këtë ngarkesë e që do të zgjidhet shumë shpejtë. Po ashtu, mungesa për një kohë e materialeve për prodhimin e këtyre dokumenteve ka bërë që të ketë tejngarkim të sistemit duke marrë parasysh se vetëm brenda pak ditësh janë prodhuar rreth 60.000 sosh”, përfundon njoftimi.
