Qendra Kombëtare e Transfuzionit të Gjakut në Prishtinë dje u kthye në ring boksi. Për motive ende të panjohura, dy mjekët Betim Morina dhe Idriz Merovci, janë përfshirë në një konflikt verbal, i cili më pas eskaloi në sulm fizik. Lidhur me rastin është arrestuar Morina, i cili dyshohet se i shkaktoi lëndime të rënda trupore kolegut të tij, Idriz Merovcit, raporton Gazeta Sinjali.
Sinjali ka mësuar detaje ekskluzive lidhur me rastin, ku Merovci u dërgua me urgjencë për tretman mjekësor. Pas ekzaminimeve të mjekëve, burimet e Sinjalit bëjnë me dije se është konstatuar që mjeku 47-vjeçar ka pësuar frakturë në hundë pas goditjeve të Morinës.
Në vendin e ngjarjes kanë dalë edhe njësitë policore, të cilët në kuadër të veprimeve hetimore kanë marrë edhe dëshminë e drejtoreshës së QKTGJ-së, Bukurije Zhubi, e cila u intervistua në cilësinë e dëshmitares.
Sinjali ka kontaktuar Zhubin për të marrë një prononcim lidhur me rastin, mirëpo e njëjta ka pohuar se ndodhet në një takim, teksa më vonë nuk është përgjigjur në pyetjet e redaksisë.
Ndërkohë Morina është shoqëruar në stacion policor ku është intervistuar nga organet e hetuesisë.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor nën dyshimet për kryerjen e veprës penale ‘Lëndim i rëndë trupor’.
Për rastin janë deklaruar edhe nga Policia e Kosovës.
“Është arrestuar i dyshuari mashkull kosovar pasi i njëjti kishte sulmuar fizikisht viktimën mashkull kosovar. Si pasojë e sulmit fizik viktima ka pësuar lëndime të rënda trupore. Me vendim të prokurorit i dyshuari është dërguar në mbajtje”, thuhet në njoftimin e Policisë.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.