Një marrëveshje paqeje midis Kievit dhe Moskës është duke u hartuar nga avokatët, por avancimi i negociatave varet nga pranimi i armëpushimit nga Kremlini, ka thënë ministri i mbrojtjes i Ukrainës, shkruan The Guardian.
Oleksii Reznikov, i cili ka udhëhequr delegacionin ukrainas në negociata, tha se puna teknike po përparon, por Rusia duhet t’i ndalë bombardimet që të ishte i mundur çdo kompromis.
Duke folur përmes video-lidhjes me eurodeputetët në komitetin e punëve të jashtme dhe nënkomitetin e sigurisë dhe mbrojtjes, Reznikov tha se liderët ndërkombëtarë, si kryeministri izraelit, Naftali Bennett, po përpiqeshin të ndërmjetësonin.
“Natyrisht, para së gjithash gjatë negociatave do të flasim për një armëpushim, për korridoret humanitare, për sigurimin e popullatës civile me evakuim, me ujë, me ushqim dhe ndoshta më vonë do ta nënshkruajmë këtë marrëveshje për paqe”, tha ai.
