“Il Corriere dello Sport” raporton se Paolo Maldini ka telefonuar Carlo Ancelottin për të marrë vesh disponueshmërinë e Marco Asensio dhe se kuqezinjtë janë përpara Arsenalit dhe Manchester United në garën për nënshkrimin e spanjollit.
Asensio mund të largohet nga Bernabeu në verë pasi kontrata e tij skadon në qershor 2023. Milani ka nevojë për një krah të ri të djathtë për 2022-23 dhe spanjolli është një nga objektivat e kuqezinjve.
Sipas ‘Il Corriere dello Sport’, drejtori i Milanit, Paolo Maldini, së fundmi ka telefonuar ish-trajnerin e tij Ancelotti, tani në krye të Madridit, për të sqaruar disponueshmërinë e anësorit të talentuar. Ancelotti është i hapur për t’u ndarë me Asensio, por Madridi dëshiron të paktën 30-35 milionë euro, kështu që Milani tani duhet të negociojë me kampionët e La Ligës.
Arsenali dhe Manchester United gjithashtu i kanë vënë syrin te Asensio, por gjigantët e Serisë A do të luajnë futboll në Champions League sezonin e ardhshëm, ndaj janë përpara në garën për nënshkrimin e 26-vjeçarit.
Asensio nuk është objektivi i vetëm i Milanit për krahun e djathtë pasi Noa Lang i Club Brugge është gjithashtu në radarët e Diavolit.
