Mbrëmë ka ndodhur një rrahje mes pesë personave në një lokal të kompanisë së derivateve “HIB”, në Gjilan. Përveç grushteve aty janë përdorur edhe mjete të forta si karrige dhe gjësende tjera. Sinjali ka marrë përgjigje zyrtare nga policia për këtë incident.
Zëdhënësëi i policisë rajonale të Gjilanit, Ismet Hashani, ka konfirmuar rrahjen dhe sipas tij përleshja fizike ka ardhur pas një fjalosje të ashpër.
Policia ka identifikuar të dyshuarit dhe ka konstatuar se të gjithë kanë qenë nën ndikimin e alkoolit. Njëri nga të dyshuarit ka marrë lëndime më të rënda trupore dhe ka pranuar ndihmë mjekësore, raporton Sinjali.
“Policia e Kosovës në Gjilan është njoftuar për një rast rrahje në pompën e derivateve “HIB-Petrol”. Nga informatat e marra, incidenti ka ndodhë në orët e vona të natës të datës 12 gusht 2019, në mes të pesë personave të dyshuar. Pas një fjalosje të ashpër ka ardhë deri te rrahja mes tyre, duke goditur njëri -tjetrin me mjete të forta. Njëri nga personat e përfshirë në incident ka pësuar lëndime dhe ka kërkuar ndihmën e mjekut. Nga ana e Policisë së Kosoves janë identifikuar të dyshuarit dhe në bazë të matjeve ka rezultuar se të gjithë të dyshuarit kanë qenë nën ndikimin e alkoolit. Për rastin është njoftuar prokurori i shtetit. Njësitet e hetimeve të stacionit policor të Gjilanit janë duke i bërë hetimet rreth rastit”, tha Hashani për Sinjalin.
