Ministri i Mbrojtjes, Armend Mehaj, ka shprehur gatishmërinë për të mbështetur institucionet greke me aftësitë dhe kapacitetet që ka Kosova në disponim për menaxhimin, tejkalimin dhe sanimin e gjendjes së krijuar nga zjarret e ditëve të fundit.
Ai këto deklarata i ka bërë sot në një bisedë telefonike me shefen e Zyrës Ndërlidhëse të Republikës së Greqisë në Kosovë, Chryssoula Aliferi, transmeton Gazeta Sinjali.
Mehaj në një postim në Facebook ka shkruar se kërcënimet nga faktorët e sotëm përcaktojnë faktin se bashkëpunimi ndërmjet vendeve të rajonit është nevojë e pashmangshme.
Postimi i plotë
Në bisedën e sotme telefonike me shefen e Zyrës Ndërlidhëse të Republikës së Greqisë në Kosovë, Chryssoula Aliferi, i shpreha gatishmërinë dhe vullnetin tonë të plotë për të mbështetur institucionet greke me aftësitë dhe kapacitetet tona operacionale në disponim për menaxhimin, tejkalimin dhe sanimin e gjendjes së krijuar nga zjarret e ditëve të fundit.
Kërcënimet dhe rreziqet nga faktorët e ndryshëm në realitetin e sotëm, përcaktojnë faktin se, fryma e bashkëpunimit rajonal në parandalimin, menaxhimin, reagimin dhe rimkëmbjen pas pasojave të tyre, është nevojë e pashmangshme për të gjitha vendet e rajonit tonë dhe më gjerë.
