Lidhja Demokratike e Kosovës për pak minuta nis mbledhjen e kryesisë së saj. Burime të gazetës Sinjali, brenda LDK-së thonë se në këtë takim do të diskutohet kryesisht per organizimin në detaje të Kuvendit Zgjedhor të 3 gushtit, por nuk përjashtohet mundësia që në këtë takim të konfirmohet përfundimisht emri i kandidatit konsensual për kryetar të LDK-së.

Dy ditë para mbajtjes së Kuvendit zgjedhor, Lidhja Demokratike e Kosovës, sot mbledhë kryesinë e saj në përpjekje për të përgatitur gjithcka në lidhje më ditën e shtunë. Pos kohës dhe vendit kur do të mbahet kuvendi zgjedhor, tashmë dihet se kandidatët potencialë për kreun e LDK-së janë disa figura kyçe të kësaj partie.

Siç mëson “Sinjali”, në takimin e sotëm të kryesisë së LDK-së do të diskutohet kryesisht për përgatitjet e fundit për kuvendin zgjedhor të së shtunës, i cili po konsiderohet si vendimtar për të ardhmen e LDK-së por edhe për fatin e kësaj partie pas zgjedhjeve të ardhshme.

Njëri nga nënkryetarët e LDK-së pa dashur t’i përmendet emri tha për ‘Sinjalin’ se LDK vazhdon të jetë në kërkim të një marrëveshje të mundshme për një kandidat konsensual ani pse kjo është goxha vështirë e arritshme, marrë parasysh faktin se në LDK ka shumë njerëz të gatshëm për t’i hyrë kësaj gare./Sinjali/