Ministria e Arsimit, Shkencës, Teknologjisë dhe Inovacionit (MASHT) ka njoftuar se ka mbledhur informatat nga komunat e Kosovës, pas motit të keq që ka shkaktuar dëme në disa komuna dhe si rezultat, komunat kanë vendosur që të mos zhvillohet procesi mësimor për ditën e sotme.

Sipas informatave nga terreni, në shkollat e Istogut, Klinës, Kamenicës dhe Dragashit, gjatë ditës së sotme nuk po zhvillohet mësimi.

“Në Prishtinë punojnë të gjitha shkollat, përveç shkollave ,”Mitrush Kuteli’’ dhe ,”Tefik Çanga’’. Në Lipjan nuk punohet sot vetëm në shkollat ,,Ibrahim Krasniqi”– Smallushë dhe ,,Rexhep Aklapi” – Akllap, ndërsa në Mitrovicë nuk punohet në katër shkolla. Në Shtime (Pjetërshticë), shkolla ,,Idriz Ajeti” punon me orar të shkurtuar, sikur edhe në Ferizaj ku shkollat po punojnë me vështirësi dhe disa prej tyre me orar të shkurtuar”, thotë MASHT-i.

“Po ashtu, në Prizren, mësimi po zhvillohet me vështirësi në zonat e thella malore, si Nëpërgosht, Manastericë dhe Llukficë. Ndërsa, në Pejë janë pesë shkolla ku nuk po zhvillohet mësimi. Në Komunën e Vitisë mësimi nuk ka filluar në ndërrimin e parë në shkollat ”Mirali Sejdiu” në Gërmovë dhe ”Hysen Tërpeza” në Tërpezë, për shkak të ndërprerjes së rrymës, por pritet të mbahet mësimi në ndërrimin e dytë”, thuhet tutje në njoftimin e ministrisë.

MASHT thotë se të gjitha shkollat ku është ndërprerë mësimi për shkak të kushteve atmosferike, do t’i zëvendësojnë orët e humbura. /Gazeta Sinjali/