Portieri francez Mike Maignan mund të largohet nga Milani, pavarësisht se rinovoi kontratën me klubin italian deri në vitin 2031 në fillim të këtij viti.
Sipas raportimeve nga Italia, 30-vjeçari është i pakënaqur me drejtimin aktual të klubit pas largimit të disa figurave kyçe nga struktura sportive. Thuhet se largimet e Massimiliano Allegrit dhe Claudio Filippit kanë ndikuar në qëndrimin e tij, pasi prania e tyre kishte qenë një nga arsyet që e kishte bindur të refuzonte një transferim te Chelsea.
Përfaqësuesit e Maignan janë në pritje të sqarimeve nga drejtuesit e Milanit lidhur me projektin dhe planet e ardhshme të klubit. Sipas të njëjtave burime, ata do të ishin të gatshëm të shqyrtonin një kalim në Stamford Bridge në rast se Chelsea rikthen interesimin për portierin francez.
Raporti thekson se emërimi i një drejtori sportiv me reputacion dhe i një trajneri të nivelit të lartë mund të ndikojë që Maignan të vazhdojë karrierën në “San Siro”.
Nga ana tjetër, Chelsea vazhdon të kërkojë një portier të besueshëm për afatgjatë dhe e sheh francezin si një alternativë tërheqëse, pavarësisht shqetësimeve të fundit që lidhen me lëndimet dhe paqëndrueshmërinë në formë.
Përvoja e tij në nivelet më të larta dhe aftësia për të performuar në ndeshje me presion të madh vazhdojnë ta mbajnë Maignan në mesin e objektivave kryesorë të klubit londinez.
Sinjali – aty ku e vërteta flet para lajmit!
