Gara internacionale për dizajnin e enterierit dhe produkteve të ndryshme, WIN Awards, së fundmi ka publikuar listën e ngushtë të projekteve në të gjitha kategoritë, ku në njërën prej tyre hyn edhe një projekt nga Kosova.

Bëhet fjalë për projektin e studios së arkitektëve dhe inxhinierëve “Maden Group” në American School of Kosova, i cili është në listën e pesë projekteve më të mira në kategorinë Learning, kategori që përfshin institucionet arsimore siç janë: shkollat, kolegjet dhe bibliotekat.

“Jemi të lumtur që jemi përzgjedhur në lisën e ngushtë nga WIN Awards 2019″ me American School of Kosova“, ka shkruar Maden Group në një postim në rrjetin social Facebook.

Prezantimi dhe shpërndarja e çmimeve do të bëhet më 24 tetor në Londër, në eventin WIN WAN.

WIN Awards, çdo vit mirëpret arkitektë, dizajnerë të enterierit dhe dizajnerë të produkteve nga e gjithë bota, ku çmimet ofrojnë një mundësi fantastike për të shfaqur punën te një audiencë ndërkombëtare./Sinjali/