Koreja e Veriut është gati të mobilizojë fuqinë e saj bërthamore. Njoftimin e bëri vetë diktatori Kim Jong-un, duke folur në përvjetorin e armëpushimit të arritur për luftën Koreane.
Lideri i vendit të izoluar nga bota, shtoi se Koreja e Veriut është “plotësisht e gatshme për çfarëdolloj konfrontimi” me Shtetet e Bashkuara. Në fjalimin e tij për festimet e asaj që konsiderohet “Dita e Fitores”, Kim Jong Un tha se kërcënimet bërthamore nga Amerika kërkojnë që Koreja e Veriut të përmbushë një detyrë historike dhe urgjente që të përforcojë mbrojtjen.
Komentet e diktatorit vijnë mes shqetësimeve se ai po përgatit testin e shtatë bërthamor. Uashingtoni paralajmëroi muajin e kaluar se Peniani mund ta kryejë një të tillë në çdo kohë.
Testi më i fundit bërthamor ishte në 2017-ën, por testet raketore të këtij viti ishin rekord, plot 31 të tilla. Koreja e Jugut i është përgjigjur duke lëshuar 8 raketa të saj në det.
I gjithë ky kërcënim erdhi gjatë një parade ushtarake, që u shoqërua nga fishekzjarre të shumta dhe koreografi në sheshin kryesor të Penianit. Gjatë eventit nuk munguan as momentet pikante.
Zonja e parë e Koresë së Veriut, Ri Sol Ju, shpërtheu në lot pranë bashkëshortit të saj Kim Jong-un, kur në sfond u dëgjua himni kombëtar. I emocionuar u shfaq edhe diktatori, i cili gjatë intonimit mbylli sytë disa herë.
