Lidhja Demokratike e Kosovës nuk do të përkrahë pakon emergjente të propozuar nga PDK-ja në seancën e nesërme.

Kështu tha shefi i grupit parlamentar të LDK-së, Arben Gashi, ndërsa dy partitë tjera opozitare, AAK dhe Nisma-AKR thanë se do të votojnë pro një pakoje të tillë.

Deputeti i LDK-së thotë se propozimi i PDK-së është vetëm një projekt-rezolutë dhe nuk është obliguese për qeverinë në detyrë.

“Në formën siç është nuk e përkrahim”, u shpreh Gashi.

Shefi i grupit parlamentar të AAK-së, Daut Haradinaj, i dha përkrahje e pakos 320 milionëshe të PDK-së për t’u ballafaquar me krizën pandemike.

Ai tha se në këtë pako janë të përfshira edhe pikat e partisë së tij.

“Kemi edhe ne pikat tona kemi dy pako të propozuara. Është pako emergjente aktuale dhe ajo e stabilitetit ekonomik pas pandemisë. Do të inkorporojmë të dyja bashkë”, tha Haradinaj.

Ndërsa, shefi i grupit parlamentar të Nisma-AKR, Haxhi Shala u shpreh se janë të informuar për këtë pako dhe se do të koordinohen me PDK-në brenda seancës së nesërme.

“Në vija të trasha jemi të informuar në lidhje me këtë pako. Por gjithçka do të varet nga seanca dhe do të koordinohemi brenda seancës”, tha ai.

Ndërkohë gjatë ditës sotme, PDK U ka bërë thirrje të gjitha partive parlamentare të votojnë nesër për pakon emergjente. Sipas tyre, ajo i adreson nevojat e qytetarëve në këtë krizë pandemie dhe ekonomike.

Pako emergjente e Qeverisë në detyrë është paraparë të jetë 170.6 milionë euro, ndërsa ajo e propozuar nga partia opozitare, PDK 320 milionë./Gazeta Sinjali/