Paneli Zgjedhor për Ankesa dhe Parashtresa ka marrë vendim për anulimin e të gjitha votave me postë për raundin e dytë të zgjedhjeve lokale në komunën e Dragashi. Këtë vendim e ka kritikuar Lidhja Demokratike e Kosovës.
Në një postim në Facebook, LDK ka bërë të ditur se do të ankohen në Gjykatën supreme për këtë vendim.
“LDK do të ankohet në Supreme e në rast të nevojës dhe në Kushtetuese. Betejat politike të fituara me votë s’mund të transferohen në tavolinë. Duam të besojmë se Supremja do të korrigjoj këtë skandal të ri në vend”, thuhet ndër të tjera në postimin e LDK-së.
PZAP ka aprovuar ankesën e kandidatit të PDK-së, për kryetar të Dragashit, Shaban Shabani dhe ka anuluar të gjitha fletëvotimet e dorëzuara përmes postës për balotazhin e 14 nëntorit për kryetar të kësaj komune.
Postimi i plotë:
REAGIM MBI VENDIMIN SKANDALOZ TË PZAP
Të dashur qytetarë,
Sot, PZAP morri vendim skandaloz e të paprecedentë në sistemin zgjedhor të Kosovës. Anulojë të gjitha votat e mërgatës – të gjitha pa përjashtim – në rastin e Dragashit. Me këtë vendim, si asnjëherë më parë, duke i anuluar në bllok votat e njerëzve tanë, PZAP tenton të ndryshojë vullnetin qytetar.
Lidhja Demokratike e Kosovës, vlerëson se gjithë procesi i regjistrimit dhe votimit të qytetarëve tanë nga jashtë vendit, bazuar edhe në vendimet e KQZ-së, është zhvilluar brenda afateve dhe në përputhje të plotë me dispozitat ligjore dhe rregullat e Komisionit Qendror të Zgjedhjeve. Prandaj, ky proces, procesi i votimit përmes postës, nuk është kontestuar në asnjë fazë të zhvillimit të tij nga askush dhe është vlerësuar plotësisht i ligjshëm edhe nga Komisioni Qendror i Zgjedhjeve i cili ka proceduar me pranimin, verifikimin dhe numërimin e këtyre votave në përputhje me procedurat e parapara ligjore.
Kujtojmë se të njëjtat vota ishin pranuar e certifikuar në raund të parë.
Mbi të gjitha, në këtë transformim të vullnetit qytetar, PZAP nuk ka marrë as mundin e as përpjekjen për t’i kontaktuar qytetarët tanë në mërgatë.
LDK do të ankohet në Supreme e në rast të nevojës dhe në Kushtetuese. Betejat politike të fituara me votë s’mund të transferohen në tavolinë. Duam të besojmë se Supremja do të korrigjoj këtë skandal të ri në vend.
LDK – Zyra për Informim
