Opozita shprehen të shqetësuar me gjendjen që po mbretëron në sektorin e shëndetësisë, duke theksuar se ka papërgjegjësi totale në udhëheqjen e këtij sektori nga Qeveria. Madje, ata thonë se shëndetësia në Kosovë nuk ka qenë asnjëherë prioritet i qeverisjes së vendit. Ish-ministri i Shëndetësisë, deputeti i LDK-së Armend Zemaj ka thënë se ndërrimin i ministrave ka lënë shije të keqe në këtë sektor.
Sipas tij, kryeministri Albin Kurti nuk e ka vëmendjen te kuadro e reja të cilat dita ditës po largohen nga Kosova.
“Ka papërgjegjësi totale në udhëheqjen e këtij sektori jo tash, por qe 20 muaj të kësaj qeverie duket qe nuk ka as vizion dhe nuk kemi parë as program të qartë se si të punohet dhe menaxhohet por edhe të ecet tutje në avancimin e shërbimeve shëndetësore. Edhe pjesa politike ka pasur të metat e saj, ndërrimi i ministrave te dobët kanë lënë shije të keqe në këtë sektor. E kemi gjendje degraduese në këtë fund vit ku përballjen me vështirësi e kanë pacientët dhe gjithë qytetaret pa përjashtim. Me këtë qasje me këta njerëz pa punëtorë pa ide, mashtrues kemi pak shpresë që nga kjo mazhorancë të vije dikush që mund të udhëheqë me këtë sektor i cili është tepër i rëndësishëm dhe çdo ditë përballen qytetaret me kërkesa të ndryshme”.
Deputeti i Aleancës për Ardhëmrinë e Kosovës (AAK), Shemsedin Dreshaj theksoi se sektori i shëndetësisë nuk mund të funksionojë pa prani të ministrit, duke shtuar se përgjegjësinë për këtë duhet të marrë kryeministri.
“Situata në shëndetësi nuk është e mirë dhe duhet të zgjidhet sa më parë. Ministria të funksionojë pa prani të ministrit nuk është në rregull ndërsa përgjegjësitë ti mbajë mbi vete kryeministri i cili ka mjaft obligime të tjera”.“Shëndetësia është problematike gjithkund në botë. Shëndetësia në Kosovë nuk ka qenë asnjëherë prioritet i qeverisjes së vendit e as kësaj Qeverie aq më pak kur kjo qeveri vije me 50% të buxhetit të reduktuar në shëndetësi dhe merret me disa infuzione siç është rasti me 4 milionë për barna esenciale. Politikat shëndetësore duhet të ndërrohen komplet me ligjin për sigurinë shëndetësore. Sa më urgjente për shëndetësinë dhe të mos na largohen mjekët është të sillet ligji i pagave”, tha Dreshaj, raporton EO.
