Gazeta Sinjali ka raportuar vazhdimisht për zyrtarë policorë të cilët janë suspenduar për vepra të ndryshme penale. Lidhur me numrin e zyrtarëve të suspenduar, Sinjali ka kërkuar nga Inspektorati Policor i Kosovës detaje për ankesat që janë dërguar në këtë institucion gjatë këtij viti.
Në periudhën 9 mujore të vitit 2020, IPK ka pranuar gjithej 1122 ankesa, numër ky që është rritur krahasuar me periudhën e vitit të kaluar.
Në përgjigjen e IPK-së për Gazetën Sinjali, thuhet se këtë vit janë dorëzuar 92 ankesa më shumë.
“IPK gjatë periudhës nëntë mujore të 2020-ës ka pranuar gjithsej 1122 ankesa, ku prej tyre në Departamentin e Hetimeve -IPK janë dërguar 410 ankesa për hetim penal dhe 5 ankesa janë dërguar në për hetime disiplinore. Në mungesë të elementeve të veprës penale 703 ankesa janë dërguar në Drejtorinë e Hetimeve të Brendshme dhe Verifikim të Kaluarës në Policinë e Kosovës (DHBVK) për hetim disiplinor.
Trend i numrit të ankesave është përafërsisht i njëjtë me atë të vitit të kaluar me një ngritje të vogël krahasuar me vitin e kaluar (92 ankesa më shumë këtë vit)”, thuhet në përgjigje.
Derisa gjatë kësaj periudhe IP, ka arrestuar 27 zyrtarë policorë dhe 3 zyrtarë të Policisë së Kosovës, nga stafi civil.
“Gjatë periudhës kohore nëntë mujore të 2020-ës Inspektorati Policor i Kosovës, përkatësisht Departamenti i Hetimeve, me autorizim të Prokurorit dhe në bashkëpunim me Policinë e Kosovës ka arrestuar njëzetë e shtatë (27) zyrtarë policorë dhe tre (03) zyrtarë të PK-së nga stafi civil. Me rekomandim të IPK-së janë suspenduar janë pesëdhjetë e pesë (55) zyrtar policor dhe tre (03) staf civil”, thuhet tutje në përgjigjen e IPK-së.
